१८ जेठ, विराटनगर । झापाको दमकमा घरबाट बेपत्ता भएकी एक युवती मृत अवस्थामा फेला परेकी छन्। दमक नगरपालिका–८ बसन्त टोलकी २१ वर्षीया रमा तिवारीको शव शनिबार रतुवा खोलामा बोराभित्र पोको पारिएको अवस्थामा भेटिएको प्रहरीले जनाएको छ।
प्रहरीका अनुसार रमा गत जेठ १३ गते राति करिब ९:३० बजे घरबाट हराएकी थिइन्। परिवारले उनको खोजी गरिरहेका बेला शनिबार बिहान दमक–१० स्थित सेतुमारी क्षेत्रमा रहेको रतुवा खोलाको पुलमुनि सेतो प्लास्टिकको बोरामा शव फेला परेको हो।
शवको पहिचान मृतकका बुवा नारायण तिवारी र आमा मुना तिवारीले गरेका थिए। प्रारम्भिक अनुसन्धानका क्रममा युवतीको अन्यत्र हत्या गरी शव पुलमाथिबाट खोलामा फालिएको हुनसक्ने आशंका प्रहरीले गरेको छ।
झापा जिल्ला प्रहरी कार्यालयका प्रवक्ता डीएसपी खगेन्द्र खड्काले घटनाको गम्भीरतापूर्वक अनुसन्धान भइरहेको जानकारी दिए। हत्या कसले र किन गर्यो भन्ने विषयमा विभिन्न कोणबाट अनुसन्धान अघि बढाइएको प्रहरीले जनाएको छ।
घरबाट बेपत्ता भएकी युवतीको केही दिनपछि विभत्स अवस्थामा शव फेला परेपछि स्थानीय क्षेत्रमा त्रास र शोक फैलिएको छ। प्रहरीले घटनामा संलग्न व्यक्तिको खोजी तथा तथ्य खुलाउने प्रयास तीव्र बनाएको जनाएको छ।
