१८ चैत, काठमाडौं । सरकार गठनपछिका केही दिनमा सेयर बजार निरन्तर ओरालो लागेको छ। पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ भएपछि एमालेको सडक आन्दोलन सुरु हुनु, बजारमा डर र अनिश्चितता बढाएको मुख्य कारण मानिन्छ।
त्यसैगरी, सम्पत्ति शुद्धीकरण अनुसन्धान विभागले व्यवसायीमाथि छानबिन गर्न लागेको हल्लाले लगानीकर्तामा अनावश्यक त्रास फैलाएको छ। मंगलबार र बुधबार बजारमा ठूलो गिरावट देखिएको छ।
ब्रोकर र विशेषज्ञहरू भन्छन्, “पूँजीबजार पूर्णत: बैंकिङ प्रणालीमार्फत पारदर्शी रूपमा सञ्चालन हुन्छ। यसकारण अनुसन्धानको हल्लामा लगानीकर्ताले हतारमा सेयर बेच्नु उचित छैन।” नेपाल इन्भेस्टर्स फोरमका अध्यक्ष तुलसीराम ढकालले पनि लगानीकर्ताले डराउनुको कुनै कारण नरहेको बताए।
पारदर्शी बजारलाई अझ बलियो बनाउन सरकारले हालै नेपाल स्टक एक्स्चेन्ज (नेप्से) मार्फत मार्जिन कारोबार कार्यविधि तयार गरेको छ। वैशाखदेखि मार्जिन लेन्डिङ सुविधा सुरु हुने तयारीले दीर्घकालीन रूपमा बजारलाई मजबुत बनाउने अपेक्षा गरिएको छ।
विशेषज्ञहरूका अनुसार, राजनीतिक अस्थिरता र हल्ला बजारमा छोटो समयको नकारात्मक प्रभाव पार्न सक्छ, तर दीर्घकालीन दृष्टिले नयाँ नीतिहरूले बजारलाई दिगो बनाउने विश्वास छ।
