२५ चैत, काठमाडौं । पूर्वप्रधानमन्त्री शेरबहादुर देउवा र उनकी पत्नी तथा पूर्वपरराष्ट्रमन्त्री आरजु राणा देउवा विरुद्ध पक्राउ पूर्जी जारी भएको छ। सम्पत्ति शुद्धीकरणसम्बन्धी अनुसन्धानका आधारमा सम्पत्ति शुद्धीकरण अनुसन्धान विभाग को सिफारिसपछि काठमाडौं जिल्ला अदालत ले उक्त आदेश दिएको हो।
अदालतबाट पक्राउ पूर्जी जारी हुँदा देउवा दम्पती भने देश बाहिर रहेका छन्। उनीहरू गत १४ फागुनमा उपचारका लागि सिंगापुर गएका थिए र पछि हङकङ पुगेको स्रोतले जनाएको छ। हालसम्म उनीहरू नेपाल फर्किएका छैनन्।
नेपाल प्रहरीका अनुसार, अब देउवा दम्पतीलाई पक्राउ गर्न इन्टरपोल मार्फत नोटिस जारी गर्ने प्रक्रिया अघि बढाइनेछ। यसका लागि अदालतको आधिकारिक कागजात आवश्यक पर्ने भएकाले पक्राउ पूर्जी जारी भएसँगै अन्तर्राष्ट्रिय प्रक्रियाको बाटो खुलेको एक उच्च प्रहरी अधिकारीले बताए।
इन्टरपोलमार्फत नोटिस जारी भएपछि सदस्य १९६ देशका सुरक्षा निकायहरूले उनीहरूलाई पक्राउ गर्न सक्नेछन्। पक्राउ परेपछि कानूनी प्रक्रिया पूरा गरी नेपाल ल्याउने व्यवस्था गरिनेछ।
यसैबीच, अनुसन्धानका क्रममा देउवा परिवारसँग सम्बन्धित अस्वाभाविक आर्थिक कारोबार र सम्पत्तिको विवरण संकलन भइरहेको छ। विशेषगरी जयवीर देउवाका नाममा पछिल्लो समय किनिएको करिब ७३ रोपनी जग्गा तथा नातेदारमार्फत भएको आर्थिक कारोबारलाई अनुसन्धानको दायरामा ल्याइएको छ।
यसअघि नक्कली भुटानी शरणार्थी प्रकरण र नेपाल टेलिकम सम्बन्धी बिलिङ अनियमितता प्रकरणसँग पनि आरजु राणाको नाम जोडिएको थियो।
देउवा निवास बूढानीलकण्ठ मा भएको आगजनी र त्यहाँ भेटिएका जलेका नोटहरूको भिडियो सार्वजनिक भएपछि यस विषयमा अनुसन्धान थप तीव्र बनाइएको हो। उक्त घटनापछि विभागले मुचुल्का उठाएर फाइल नेपाल प्रहरी केन्द्रीय अनुसन्धान ब्यूरोमा पठाएको थियो।
प्रहरी स्रोतका अनुसार, अब अन्तर्राष्ट्रिय स्तरमै खोजी प्रक्रिया अघि बढाइने भएकाले देउवा दम्पतीमाथि कानूनी दबाब थप बढ्ने देखिएको छ।
