नागरिकताको समस्या छिट्टै सामधान हुन्छ : मन्त्री खाँण

२१ चैत, कलैया । गृहमन्त्री बालकृष्ण खाँणले नागरिकताको समस्या छिट्टै सामधान हुने बताएका छन् । नेपाली कांग्रेस क्षेत्र नं १ क्षेत्रीय समितिले आज यहाँ आयोजना गरेको आमसभामा उनले मधेसमा नागरिकताको ठूलो समस्या रहेको स्वीकार्दै नेपालमा जन्मेर हुर्किएकालाई नागरिकताबाट वञ्चित नगर्ने प्रतिबद्धता व्यक्त गरे।

कानुनको अभावका कारण नागरिकता वितरणमा केही समस्या रहेको र त्यो समस्या अब छिट्टै सामधान हुने उनको दाबी थियो । नागरिकता सम्बन्धी कानुन निर्माणको प्रस्ताव सदनमा रहेको भन्दै उनले राष्ट्रिय सहमति जुटाएर नागरिकता ऐन बनाउन प्रधानमन्त्री शेरबहादुर देउवा लागि परेको जानकारी दिए । नागरिकता ऐन बनिसकेपछि पालिकास्तरमै टोली खटाएर नागरिकता वितरण गर्ने सरकारको सोच रहेको उनले प्रष्ट पारे । मन्त्री खाँणले मधेसी जनता नेपालको सच्चा राष्ट्रवादी भएको बताए। 

उनले मधेसी जनताले नेपालको भूमि र सीमाको पहरेदारी गरेर रक्षा गरिरहेका बताउँदै धन्यवाद ज्ञापन गरे । मन्त्री खाँडले भने, “भूमिको सुरक्षा मधेसकै दाजुभाइ दिदीबहिनीले गरिरहेको तथ्यलाई कसैले विर्सिन हुँदैन ।” 

त्यस अवसरमा सिम्रौनगढ नगरपालिकका उपप्रमुख रिमादेवी कुसवाहा, तत्कालीन तमलोपाका पूर्वकेन्द्रीय सदस्य मोहनमहतो कोइरी, पूर्वक्षेत्रीय अध्यक्ष ओमप्रकाश ठाकुर, बारागढी गाँउपालिका–६ मा तत्कालीन सङ्घीय समाजवादी पार्टीबाट निर्वाचन वडाध्यक्ष निरज साहसहित विभिन्न पार्टीका कार्यकर्ता कांग्रेसमा प्रवेश गरेका थिए । 

मन्त्री खाँणले आजै ऐतिहासिक पोखरी झरौखरमा स्वर्गीय भागवतप्रसाद यादवको प्रतिमा अनावरण गरे । कांग्रेसको सिद्धान्त राष्ट्रवादको जगमा उभिएको भन्दै मन्त्री खाँणले सबै भूगोल, जात धर्मका नेपालीलाई एकताको सुत्रमा बाँधेर नेपाललाई सबल र बलियो बनाउने विश्वास व्यक्त गरे। मधेस प्रदेशलाई नेपालकै अब्बल प्रदेश बनाउन कांग्रेसले अग्रसरता लिने उनले बताए । 

कांग्रेस बारा निर्वाचन क्षेत्र नम्बर १ का सभापति विजयशङ्कर यादवको सभापतित्वमा सम्पन्न भएको सो कार्यक्रममा कांग्रेसका सहमहमन्त्री फरमुल्लह मञ्सुर, सहमहमन्त्री उमाकान्त चौधरी, अर्का सहमहमन्त्री महेन्द्र यादव, मधेस प्रदेशका सभापति कृष्णप्रसाद यादव, उपसभापति चन्द्रशेखर यादवलगायतले आफ्नो विचार व्यक्त गरेका थिए।