४ वैशाख, मोरङ (गोठगाउँ) । पत्रकार सुशील दर्नाललाई पूर्वाञ्चल विश्वविद्यालयले ‘ओम प्रकाश गोयल गोल्ड मेडल’ (स्वर्ण पदक) प्रदान गरेको छ । विश्वविद्यालयले २०७७ साल (सन् २०२०)मा ‘मास्टर अफ आटर्स इन मास कम्युनिकेशन एन्ड जोर्नालिज्म’ (एमएएमसिजे) प्रोग्राममा प्रथम भएबापत सो पदक प्रदान गरेको हो ।
विगत १३ वर्षदेखि राष्ट्रिय समाचार समिति (रासस)मा पत्रकारिता गर्दै आएका उनलाई विश्वविद्यायद्वारा यहाँ आज आयोजित ‘दसौँ दीक्षान्त समारोह’मा शिक्षा, विज्ञान तथा प्रविधिमन्त्री देवेन्द्र पौडेल र तिलगङ्गा आँखा प्रतिष्ठान, गौशाला, काठमाडौँका संस्थापक तथा कार्यकारी निर्देशक प्राडा सन्दुक रूइतले पदक प्रदान गर्नुभयो । रैनादेवी छहरा–५, मुझुङ्ग, पाल्पामा जन्मिएका दर्नालले सामाजिक विषयमा लेख्दै आएका छन् ।
पत्रकार दर्नालले पत्रकारिताको क्षेत्रमा योगदान पु¥याएबापत ‘प्रेस काउन्सिल समावेशी पत्रकारिता पुरस्कार–२०७३’, ‘बाल संवेदनशील राष्ट्रिय पत्रकारिता पुरस्कार–२०७४’, ‘रिपोर्टर्स क्लब–उत्कृष्ट युवा पत्रकारिता पुरस्कार–२०७४’ ‘मानव बेचबिखन तथा ओसारपसारविरुद्ध जनजागरण सम्मान–२०७६’ लगायत सम्मान तथा पुरस्कार प्राप्त गरिसकेका छन् ।
समारोहमा विश्वविद्याय स्वर्ण पदक र विभिन्न सङ्कायबाट २०७४ सालदेखि २०७७ सालभित्र सर्वप्रथम हुने ४२ विद्यार्थीलाई स्वर्ण पदक प्रदान गरिएको थियो । 
