१० चैत, काठमाडौं । प्रदीप पौडेल ले विशेष महाधिवेशनबाट निर्वाचित नेतृत्वमाथि प्रश्न उठाउनु उचित नहुने बताएका छन्। उनका अनुसार यदि त्यस नेतृत्वलाई अस्वीकार गरिन्छ भने प्रतिनिधिसभा निर्वाचनमाथि पनि प्रश्न उठ्ने अवस्था सिर्जना हुन्छ।
नेपाली कांग्रेस को केन्द्रीय कार्यालय सानेपामा सञ्चारकर्मीसँग कुरा गर्दै महामन्त्री पौडेलले विशेष महाधिवेशनबाट चयन भएको समिति नै आगामी पन्ध्रौं महाधिवेशनको तयारीमा जुटिरहेको स्पष्ट पारे।
उनले केही अग्रज नेताहरूले प्रक्रियागत विषयमा असहमति राखेको स्वीकार गर्दै त्यसलाई सुधार गर्न पार्टी तयार रहेको बताए। “हामी कसैलाई अपमान गर्ने उद्देश्यमा छैनौं, पार्टीलाई कसरी एकीकृत र व्यवस्थित बनाउने भन्नेमा केन्द्रित छौं,” उनले भने।
पौडेलले प्रक्रिया अघि बढिसकेपछि त्यसलाई फर्काउने भन्दा पनि सबैलाई समेटेर अघि बढ्नु नै उचित हुने धारणा राखे। यदि व्यवहारका कारण कसैलाई ठेस पुगेको भए त्यसलाई सच्याउँदै सहकार्यमा अघि बढ्नुपर्ने उनको जोड थियो।
उनले विशेष महाधिवेशनको वैधतामाथि प्रश्न उठाउँदा त्यसबाट आएको नेतृत्व मात्र होइन, समग्र निर्वाचन प्रक्रियामाथि नै प्रश्न उठ्ने चेतावनी दिए। “विशेष महाधिवेशन मान्दिनँ भन्ने हो भने त्यसबाट आएका निर्णय र निर्वाचन कसरी मान्ने?” भन्दै उनले अब सबै मिलेर अघि बढ्नुको विकल्प नरहेको बताए।
