२३ वैशाख, काठमाडौं । नेपाल उद्योग वाणिज्य महासंघ (एफएनसीसीआई)को ६०औं साधारणसभा तथा निर्वाचनबाट नयाँ कार्यसमिति चयन भएको छ। विधानअनुसार वरिष्ठ उपाध्यक्ष अञ्जन श्रेष्ठ स्वतः अध्यक्ष बनेका छन्। उनको कार्यकाल तीन वर्षको हुनेछ।
निवर्तमान अध्यक्ष चन्द्रप्रसाद ढकाल नेतृत्वको कार्यसमितिमा वरिष्ठ उपाध्यक्ष रहेका श्रेष्ठ अब महासंघको नेतृत्व सम्हाल्ने भएका हुन्।
उपाध्यक्षतर्फ जिल्ला–नगर उद्योग वाणिज्य समूहबाट कृष्णप्रसाद शर्मा र दिलसुन्दर श्रेष्ठ निर्वाचित भएका छन्। वस्तुगत समूहबाट नरेशलाल श्रेष्ठ तथा एसोसिएटतर्फ प्रबलजंग पाण्डे उपाध्यक्षमा चयन भएका छन्।
जिल्ला तथा नगर उद्योग वाणिज्य संघतर्फ १५ जना कार्यसमिति सदस्य निर्वाचित भएका छन्। त्यसैगरी दुई महिला सदस्यमा गीता अमात्य र हिरा भट्टराई चयन भएका छन्।
प्रदेशगततर्फ कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशबाट समेत कार्यसमिति सदस्यहरू निर्वाचित भएका छन्।
वस्तुगत समूहबाट १३ जना कार्यसमिति सदस्य चयन भएका छन् भने एसोसिएट समूहबाट १७ जना सदस्य निर्वाचित भएका छन्। साथै महिला, द्विराष्ट्रिय उद्योग वाणिज्य संघ र संस्थापक सदस्य समूहबाट पनि प्रतिनिधित्व सुनिश्चित गरिएको छ।
नयाँ कार्यसमितिसँगै महासंघले निजी क्षेत्रको नीति–निर्माण र व्यवसायिक हितका विषयमा थप सक्रिय भूमिका निर्वाह गर्ने अपेक्षा गरिएको छ।
