२८ जेठ, काठमाडौं । नेपाल धितोपत्र बोर्ड (सेबोन) मा करिब दुई महिनादेखि कार्यकारी अध्यक्ष नियुक्त हुन नसक्दा पूँजी बजारसँग सम्बन्धित महत्वपूर्ण कामहरू प्रभावित भएका छन्। नेतृत्व अभावका कारण बोर्डका प्रशासनिक निर्णयदेखि नयाँ धितोपत्र निष्कासन, बोनस सेयर सूचीकरण र विभिन्न वित्तीय संस्थाको मर्जर प्रक्रिया समेत रोकिएको बताइएको छ।
पूर्वअध्यक्ष सन्तोष नारायण श्रेष्ठले पदबाट राजीनामा दिएपछि सरकारले नयाँ अध्यक्ष नियुक्तिका लागि प्रक्रिया अघि बढाएको थियो। सिफारिस समितिले जेठ ४ गते चार जनाको नाम मन्त्रिपरिषद्मा पठाए पनि हालसम्म नियुक्ति टुंगो लाग्न सकेको छैन।
अध्यक्ष नियुक्ति ढिलाइ हुँदा बोर्डका नियमित काम प्रभावित भएका छन्। नयाँ आईपीओ, हकप्रद सेयर स्वीकृति, बोनस सेयर दर्ता, लाइसेन्ससम्बन्धी प्रक्रिया तथा सामूहिक लगानी कोषका योजनाहरू अगाडि बढ्न नसकेको सरोकारवालाहरूको गुनासो छ।
बोनस सेयर वितरणका सबै कानुनी प्रक्रिया पूरा गरिसकेका कम्पनीहरू समेत बोर्डबाट अन्तिम स्वीकृति नपाउँदा नेप्सेमा सूचीकरण हुन नसकेको बताइएको छ। यसले सेयरधनीहरूलाई दोस्रो बजारमा कारोबार गर्न समेत कठिनाइ उत्पन्न गरेको छ।
यस्तै, केही वित्तीय संस्थाको मर्जर प्रक्रिया पनि बोर्डको स्वीकृतिको प्रतीक्षामा रोकिएको छ। नियामक निकायबाट समयसीमा तोकिए पनि आवश्यक निर्णय नहुँदा प्रक्रिया अन्योलमा परेको सम्बन्धित क्षेत्रका अधिकारीहरूको भनाइ छ।
बोर्डका कर्मचारीहरूका अनुसार कार्यकारी अध्यक्ष नहुँदा दैनिक प्रशासनिक कामदेखि दीर्घकालीन नीतिगत निर्णयसम्म प्रभावित भएका छन्। यसले पूँजी बजारमा अनिश्चितता बढाएको र लगानीकर्ताको मनोबलमा समेत असर परेको देखिएको छ।
