६ जेठ, काठमाडौं । शिक्षा मन्त्रालय ले आठ वटा विश्वविद्यालयको उपकुलपति पदका लागि २१८ जनाको आवेदन परेको जनाएको छ।
मन्त्रालयका अनुसार त्रिभुवन विश्वविद्यालय मा सबैभन्दा धेरै ५० जनाले आवेदन दिएका छन्। यस्तै पूर्वाञ्चल विश्वविद्यालय र पोखरा विश्वविद्यालय मा ३८/३८ जनाको आवेदन परेको छ।
अध्यादेशमार्फत पूर्व उपकुलपतिहरू पदमुक्त भएपछि नयाँ नियुक्तिका लागि खुला प्रतिस्पर्धाबाट आवेदन माग गरिएको थियो। उपकुलपति छनोटका लागि शिक्षामन्त्री सस्मित पोखरेल को अध्यक्षतामा सिफारिस समिति गठन गरिएको छ।
नयाँ कार्यविधिअनुसार उम्मेदवारको शैक्षिक योग्यता, अनुसन्धान अनुभव, भिजन पेपर, कार्ययोजना, प्रस्तुतीकरण र अन्तर्वार्ताका आधारमा मूल्यांकन गरिनेछ। उत्कृष्ट १० जनाको सर्टलिस्ट सार्वजनिक गरेर सार्वजनिक सुझावसमेत संकलन गरिने व्यवस्था गरिएको मन्त्रालयले जनाएको छ।
