बनेपा । जिल्लाको विकट महाभारत गाउँपालिका वडा नं. १ र २ का स्थानीय महिलाहरु गर्भवती भएर प्रसूति गराउन घण्टौँ हिँडेर स्वास्थ्य चौकी जानुपर्ने बाध्यताका कारण अझै पनि घरमा नै प्रसूति गर्नेको सङ्ख्या धेरै रहेको पाइएको छ ।
एकातिर भौगोलिक विकटता र अर्कोतिर बेथा लागेपछि स्वास्थ्य चौकी लैजाने मान्छेको अभावका कारण अझै पनि घरमा नै प्रसूति गराउनेको सङ्ख्या धेरै रहेको पाइएको गोकुले स्वास्थ्य चौकीका हेल्थ असिस्टेण्ट प्रविण कुँवरले बताए । उनका अनुसार अहिले पनि बेथा लागेपछि स्वाथ्य चौकी बोकेर ल्याउन नै गाह्रो हुने गरेको छ । गाउँघरमा बोकेर ल्याउने मान्छेसमेत कमी भएका कारण अझै पनि घरमा नै प्रसूति गराउनेको सङ्ख्या धेरै रहेको छ । घरमा नै प्रसूति गराउने चलन भएका कारण पनि त्यस्तो अवस्था आएको हो ।
स्वास्थ्य चौकीका अनमी हिरामाया घिसिङका अनुसार अघिल्लो आर्थिक वर्ष १८ र यस वर्ष ७ जना गरी २५ जनाले स्वाथ्य चौकीमा प्रसूति गराएका छन् । सरकारले गर्भवती भएपछि नियमित रुपमा चार पटकसम्म गर्भ जाँच गराएर स्वास्थ्य चौकीमा प्रसूति गराएबापत रु ८०० र यातायात खर्चस्वरुप रु दुई हजार गरी रु दूई हजार ८०० पाउने गरे पनि विशेष गरी स्वास्थ्य संस्थामा आएर प्रसूति गराउनेको संख्या कम रहेको उनले बताइन । अहिले पनि वडा नं. १ र २ का सेवाग्राहीलाई स्वास्थ्य चौकीसम्म आइपुग्न भूगोलअनुसार डेढ घण्टादेखि चार घण्टासम्म लाग्ने गरेको घिसिङले बताइन ।
भवन सुविधा सम्पन्न भए पनि अहिले सो स्वास्थ्य चौकी भवनमा दरबन्दीअनुसारको जनशक्ति छैन । विकट क्षेत्रमा दरबन्दीअनुसारको दक्ष जनशक्ति कम हुनुका साथै भूगोलका कारण घण्टौँ हिड्नुपर्ने बाध्यताले सेवा लिन आउनेको सङ्ख्या कमै हुने गरेको स्थानीयहरुको भनाइ छ ।
भौगोलिक विकटताका कारण प्रसूतिसम्बन्धी विगतमा भन्दा निकै सचेत भए पनि आउनेको सङ्ख्या कम भएका कारण आफूहरुले त्यसलाई सतप्रतिशत गराउन अभियान चलाएको वडा नं. १ का वडाध्यक्ष कान्छामान जिम्बाले बताए । “सिन्धुली जिल्लाको हरिहरपुरगढी गाउँपालिका–१, महाभारत गाउँपालिकाको १ र २, खानीखोला–४ लगायत गरी करिब तीन/चार घण्टा टाढादेखि हिँडेर आउनुपर्ने बाध्यता छ”, उनले भने ।
