१३ वैशाख, काठमाडौं । अखिल नेपाल फुटबल संघ (एन्फा) का निलम्बित पदाधिकारीहरूलाई विदेश यात्रा गर्न रोक लगाइएको छ। राष्ट्रिय खेलकुद परिषद् (राखेप) को सिफारिसमा सरकारले उनीहरूको पासपोर्ट रोक्का गरेपछि यस्तो निर्णय कार्यान्वयनमा आएको हो।
एन्फामा देखिएको आर्थिक अनियमिततासम्बन्धी विषयको छानबिनलाई प्रभावकारी बनाउन पदाधिकारीहरूलाई विदेश जान नदिने निर्णय गरिएको खेलकुद मन्त्रालय स्रोतले जनाएको छ। राखेपले यसअघि नै छानबिनका लागि कार्यकारी सदस्य कमल भट्टराईको संयोजकत्वमा तीन सदस्यीय उपसमिति गठन गरेको थियो।
अख्तियार दुरुपयोग अनुसन्धान आयोगबाट प्राप्त पत्रका आधारमा खेलकुद मन्त्रालयमार्फत छानबिन प्रक्रिया अघि बढाइएको राखेपका सदस्य सचिव रामचरित्र मेहताले जानकारी दिए। छानबिनका क्रममा सम्बन्धित व्यक्तिहरू देशबाहिर जान सक्ने सम्भावनालाई ध्यानमा राख्दै पासपोर्ट रोक्का गर्न पहल गरिएको बताइएको छ।
राखेपले पठाएको सिफारिसअनुसार खेलकुद मन्त्रालयले गृह मन्त्रालयमार्फत अध्यागमन विभागलाई पत्राचार गरेको थियो। सोही आधारमा सम्बन्धित पदाधिकारीहरूको पासपोर्ट रोक्का गरिएको हो।
यसअघि ‘अर्ली इलेक्सन’ विवादका कारण राखेपले चैत ११ गतेदेखि एन्फालाई तीन महिनाका लागि निलम्बन गरेको थियो। हाल उक्त विवादसँगै आर्थिक विषयसमेत छानबिनको दायरामा परेको छ।
