२२ जेठ, काठमाण्डौँ । संयुक्त राज्य अमेरिकाले क्युवाली राष्ट्रपति तथा क्यास्ट्रो परिवारका नजिकका सदस्यहरूलाई लक्षित गर्दै बिहीबार नयाँ प्रतिबन्धहरू घोषणा गरेको छ । यस कदमले क्युवा–अमेरिका सम्बन्धमा पुनः तनाव चुलिएको छ । अमेरिकी प्रतिबन्ध सूचीमा राष्ट्रपति मिगुएल डियाज–क्यानेल, उहाँकी श्रीमती र सौतेनी छोरा समेत परेका छन् ।
साथै पूर्वराष्ट्रपति राउल क्यास्ट्रोका छोरा र नाति पनि प्रतिबन्धको दायरामा आएका छन्, जसलाई क्युवाको राजनीतिक संरचनामा प्रभावशाली शक्ति–दलालका रूपमा चित्रित गरिएको छ । क्रान्तिकारी सशस्त्र बल मन्त्रालयसहित अन्य केही संस्थामाथि पनि प्रतिबन्ध लगाइएको जनाइएको छ । क्युवामाथि सन् १९६२ देखि अमेरिकी व्यापार प्रतिबन्ध लागू रहँदै आएको छ । तर पछिल्ला महिनाहरूमा राष्ट्रपति डोनाल्ड ट्रम्प प्रशासनले इन्धन आपूर्ति रोक्ने तथा टापु कब्जाको सम्भावनासमेत सङ्केत गर्दै दबाब बढाएको बताइएको छ ।
वासिङ्टनले क्युवाको कम्युनिस्ट शासनले अमेरिकी सुरक्षामा खतरा उत्पन्न गरेको आरोप लगाउँदै आएको छ । राष्ट्रपति ट्रम्पले विभिन्न अन्तर्राष्ट्रिय सन्दर्भमा क्युवाको राजनीतिक अवस्था परिवर्तन हुन सक्ने सङ्केत गर्दै आएको छ । यसबारे प्रतिक्रिया दिँदै राष्ट्रपति डियाज–क्यानेलले सामाजिक सञ्जाल एक्समार्फत ट्रम्प प्रशासनले क्युवा र अमेरिका बीचको तनाव र अवरोधलाई थप गहिरो बनाउने प्रयास गरेको आरोप लगाएको छ ।
उनले क्युवाले ‘याङ्की सरकारको आक्रामकता’ र ‘साम्राज्यवादी दबाब’ को सामना गरिरहेको बताए । विदेशमन्त्री ब्रुनो रोड्रिग्जले पनि नयाँ प्रतिबन्धलाई ‘कठोर’ भन्दै क्युवाली जनताको एकता र दृढताले यसको सामना गर्ने टिप्पणी गर्नुभयो । अमेरिकी राष्ट्रपति ट्रम्पले भने क्युवालाई राम्रोसँग सञ्चालन हुने, आफ्ना नागरिकलाई आवश्यक सुविधा दिन सक्ने देशका रूपमा हेर्न चाहेको बताएको छ । उनका अनुसार क्युवाको वर्तमान अवस्था आर्थिक र ऊर्जा सङ्कटले कमजोर बनेको छ ।
पछिल्ला महिनाहरूमा क्युवामाथि लागू गरिएको इन्धन प्रतिबन्धका कारण विद्युत् उत्पादनका लागि आवश्यक डिजेल अभाव भएको छ । यसले दैनिक २२ घण्टासम्म विद्युत् कटौती, खानेपानी अभाव तथा यातायात प्रणाली लगभग ठप्प हुने अवस्था सिर्जना गरेको बताइएको छ । देशमा खाद्यान्न र औषधिको समेत अभाव बढ्दै गएको छ, जसका कारण क्युवा मेक्सिको र चीनबाट मानवीय सहायता आपूर्तिमा निर्भर रहेको छ ।
संयुक्त राष्ट्रसङ्घीय प्रतिनिधिले पनि क्यारिबियन आँधीबेहरी मौसम सुरु भएसँगै क्युवाको मानवीय अवस्था ‘विस्फोटक ककटेल’ जस्तै गम्भीर बन्दै गएको चेतावनी दिएका छन् । गत वर्ष आएको शक्तिशाली आँधी मेलिसाबाट क्षतिग्रस्त पूर्वी क्युवा अझै पुनःस्थापनाको प्रक्रियामा रहेको जनाइएको छ । —
