८ असार, काठमाडौं । देशभर रेबिज विरुद्धको खोप (एआरभी) को गम्भीर अभाव देखिएपछि संक्रमित जनावरले टोकेका बिरामीहरू उपचारका लागि कठिनाइमा परेका छन्। सरकारी स्वास्थ्य संस्थामा खोप नपाउँदा सर्वसाधारण काठमाडौंको टेकुस्थित शुक्रराज ट्रपिकल तथा सरुवा रोग अस्पतालसम्म पुग्न बाध्य भएका छन् ।
काभ्रेपलाञ्चोकका ४० वर्षीय विकास बजगाईं कुकुरले टोकेपछि खोप खोज्दै झन्डै ३५ किलोमिटर यात्रा गरेर टेकु पुगेका छन्। उनले नजिकका सरकारी अस्पतालहरूमा खोप नपाएपछि अन्ततः काठमाडौं आउनुपरेको बताए।
टेकु अस्पतालमा पनि खोपको सीमित मात्रा मात्रै बाँकी रहेको चिकित्सकहरूले बताएका छन्। अस्पतालमा दैनिक ३०० भन्दा बढी व्यक्ति खोप लगाउन आउने गरे पनि उपलब्ध स्टक भोलिसम्म मात्र पुग्ने अवस्था छ।
चिकित्सकका अनुसार देशभर खोपको अभाव बढ्दै जाँदा जोखिममा परेका मानिसहरू समयमै उपचार नपाउने अवस्थामा छन्, जसले आगामी महिनाहरूमा रेबिजबाट हुने मृत्यु दर बढाउन सक्ने चिन्ता व्यक्त गरिएको छ।
स्वास्थ्य अधिकारीहरूका अनुसार चालु आर्थिक वर्षमा खोप खरिद प्रक्रिया दुई पटक असफल भएपछि आपूर्ति प्रभावित भएको हो। अहिले तेस्रो पटक खरिद प्रक्रिया अघि बढाइएको भए पनि आपूर्ति नियमित हुन समय लाग्ने देखिएको छ।
विशेषज्ञहरूले रेबिजलाई शतप्रतिशत रोकथाम गर्न सकिने रोग भए पनि खोप समयमै नलगाउँदा मृत्यु निश्चित हुने चेतावनी दिएका छन्। उनीहरूले खोपको अभावलाई तुरुन्त समाधान गर्न सरकारलाई आग्रह गरेका छन्।
