२७ माघ, काठमाडौँ । नेकपा एमालेका महासचिव शङ्कर पोखरेलले माओवादी केन्द्रका उपमहासचिव वर्षमान पुनसँग अनौपचारिक कुराकानी गर्न सचेत हुनुपर्ने अवस्था आएको बताएका छन् ।
पोखरेलले सामाजिक सञ्जाल फेसबुकमा स्टाटस लेख्दै अनौपचारिक कुराकानीलाई पुनले एमाले महासचिवको याचना भनेर प्रचारबाजी गरिएको भन्दै आपत्ति जनाएका हुन् ।
महासचिव पोखरेलले माओवादी केन्द्रका उपमहासचिव वर्षमान पुनलाई टेलिफोन गरी अध्यादेशमा सहयोग मागेको कुरा शनिवार पुनले गुल्मी पुगेर सार्वजनिक गरेका थिए ।
माओवादी केन्द्र गुल्मीको चन्द्रकोट गाउँपालिकाको अधिवेशनलाई शनिवार सम्बोधन गर्ने क्रममा पुनले पोखरेलले सहयोग मागेर आफूलाई टेलिफोन गरेको बताएका थिए । महासचिव पोखरेलले अनौपचारिक कुराकानीलाई सहयोगको याचना भनेर प्रचार गरिएको भन्दै असन्तुष्टि प्रकट गरेका हुन्।
