२७ माघ, काठमाडौँ । नेकपा (माओवादी केन्द्र) का स्थायी समिति सदस्यहरुले पार्टीलाई व्यवस्थित रुपमा सञ्चालन गर्न सानो आकारका कमिटी बनाइनुपर्नेमा जोड दिएका छन् ।
पार्टी मुख्यालय पेरिसडाँडामा आज बसेको स्थायी समिति बैठकमा प्रस्तावित विधान मस्यौदामाथि धारणा राख्दै सदस्यहरुले केन्द्रीय समिति एक सय ५१ सदस्यीय बनाउन उपयुक्त हुने बताएको सो पार्टीका उपाध्यक्ष एवं प्रवक्ता अग्नि सापकोटाले जानकारी दिए ।
बैठकमा धारणा राख्ने अधिकांश सदस्यले विधानको प्रस्तावनामा समाजवाद उन्मुख विचारधाराको अवधारणा समेट्न र समाजवादी मूल्य–मान्यता स्थापित गर्न त्यही अनुसारको मापदण्ड बनाइनुपर्नेमा जोड दिएका थिए । प्रस्तावित मस्यौदामाथि आज २९ जनाले धारणा राख्नुभएको उनले जानकारी दिए ।
माओवादी केन्द्रले आगामी फागुन १, २ र ३ गते राजधानीमा विधान सम्मेलन गर्दैछ । विधानको मस्यौदाका लागि माओवादीले उपाध्यक्ष पम्फा भुसालको संयोजकत्वमा विधान मस्यौदा समिति गठन गरेको थियो । उक्त समितिले प्रस्ताव गरेको विधानमाथि माओवादीको स्थायी समिति बैठकमा छलफल भएको हो ।
