२२ चैत, काठमाडौं । उद्योग, वाणिज्य तथा आपूर्तिमन्त्री रमेश रिजालले औद्योगिक नीतिमा सुधार गर्ने कामलाई सरकारले उच्च प्राथमिकतामा राखेको बताएका छन् ।
नेपाल चेम्बर अफ कमर्सका पदाधिकारीसँग आज भएको भेटमा उनले देशको आर्थिक विकासका लागि औद्योगिक नीतिमा सुधार गर्ने कामलाई सरकारले उच्च प्राथमिकतामा राखेको बताएका छन् । “म बजारमा आधारित अर्थतन्त्रमा विश्वास गर्ने व्यक्ति हुँ, उद्योग खोल्ने काम, व्यापार गर्ने काम सरकारले गर्ने होइन, निजी क्षेत्रका लागि उपयुक्त वातावरण बनाइदिने सरकारको काम हो”, उनले भने । आफू खुला बजार अर्थनीतिको पक्षमा रहेको मन्त्री रिजालको भनाइ छ ।
उनले औद्योगिक क्षमता विस्तार गरेर निर्यात प्रवर्द्धन गर्ने नीति सरकारको साझा न्यूनतम कार्यक्रममा रहेकाले सरकार अब रणनीतिका साथ अगाडि बढ्ने बताए । भेटमा चेम्बर अफ कमर्सका अध्यक्ष राजेन्द्र मल्लले निर्यात प्रवर्द्धनसम्बन्धी ठोस नीति एवं योजना ल्याउन सरकारसँग आग्रह गरे । निर्यात प्रवर्द्धनका लागि एक्सपोर्ट हाउसको अवधारणा सातवटै प्रदेशमा अविलम्ब लागू गरी निर्यात उद्योगलाई प्रोत्साहन गर्नुपर्ने उनको भनाइ छ ।
चेम्बरले निर्यात व्यापारलाई मूल्य अभिवृद्धिका आधारमा अनुदान दिने नीति अपनाउन सरकारलाई आग्रह गरेको छ । रेमिट्यान्सको पैसालाई उत्पादनमूलक उद्योगमा प्रोत्साहन गर्ने नीति बनाउन मन्त्री रिजालसमक्ष चेम्बरले आग्रह गरेको छ ।
अध्यक्ष मल्लले रेमिट्यान्सको अधिकांश हिस्सा उपभोगमा मात्रै खर्च भएकाले उत्पादनमूलक क्षेत्रमा प्रभावकारी नीतिसहित युवाको लगानीलाई प्रोत्साहन गर्नुपर्ने बताए । चेम्बरले कालोबजारी ऐन, २०३२ का कतिपय प्रावधान हालको अवस्थामा असान्दर्भिक भएकाले समयसापेक्ष सुधार गर्नुपर्ने बताएको छ । संसद्मा विचाराधीन निजी क्षेत्रसँग सम्बन्धित आर्थिक एवं अन्य विधेयकलाई समयमै पारित हुने वातावरण बनाउनसमेत मन्त्री रिजालसमक्ष आग्रह गरेको छ । 
